Lón léitheoireachta na Nollag

Tá achan duine ag dúil le dinnéar na Nollag, ach is féidir lón léitheoireachta na Nollag a bheith agat má théann tú chuig beo.ie an mhí seo.

Smaoinímid ar San Nioclás uair amháin sa bhliain anseo, ach tá áit lárnach aiges na hEaglaisí Críostaí sa Ghréig, sa Rúis agus sa Tuirc.

Tá cur síos bríomhar scríofa ag Kate Fennell faoin naomh. As Conamara Kate agus tá sí ina cónaí sa Tuirc le trí bliana anuas.

An aontaíonn tú le Ciarán Mac Aonghusa nuair a deir sé: ‘Beidh cuairt an Uachtaráin (ar Shasana) ina chuidiú mór i scéal an chaidrimh idir an dá thír.’?

Deir léitheoir i ríomhphost nach mbeidh ar Mhícheál ach cúig fhocal dá óiráid a rá i mBéarla agus an chuid eile i nGaeilge, toisc go ndúirt an Bhanríon cúig fhocal as Gaeilge nuair a tháinig sise anseo.

Bí cinnte go léann tú Balor an mhí seo: téann sé siar ar an bhliain seo le brí agus le greann. Mar shamla: de réir cosúlachta, dúirt Ruairí Mac Giolla Rua le Balor go raibh sé ag díriú isteach ar an tiomáint i mbliana: suíonn sé isteach ina Bhugatti Veyron agus tiomáineann sé síos go dtí oifig a chuntasóra é.

Cad é a thugtar ar bhurgar de chuid Tesco a thit isteach sa BBQ? - Black Beauty.

Agus ceann de chuid Lidl? - Lidl Pony.

Tá 17 alt san eagrán reatha de beo.ie.

Anois, le críochnú, tá scéal nach bhfuil chomh greannmhar sin ó Gaelport.com: ‘Fear gafa de bharr Gaeilge a labhairt.’

Stop na gardaí fear óg mar gheall ar chion tráchta: ní raibh coir throm i gceist. Nuair a d’iarr sé a chuid gnó a dhéanamh trí Ghaeilge, gabhadh é agus tugadh é i nglais lámha chuig stáisiún Gardaí, agus coinníodh é ansin go dtí go raibh fáil ar gharda a bhí ábalta déiléáil leis trí Ghaeilge. An dtarlódh sin i dtír ar bith eile ar dhroim an domhain?