Scéal brónach

0
Have your say

Tugadh Luan Gruama ar an Luan seo caite agus – tá brón orm- inniu an Aoine, Aoine Ghruama.

Má théannn tú chuig suíomh idirlín Nuacht 24 an tseachtain seo faigheann tú fógra ó na húinéirí: ‘Ar mhaith leat an fearann seo a cheannach?’ Tá seirbhís Ghaeilge eile ar shiúl de réir cosúlachta. Chaill muid Gaelport. Chaill muid Foinse. Tá Nuacht RTÉ againn ar an Idirlíon go fóill – seirbhís an-mhaith atá ann. Chomh maith leis sin, tá tuairisc.ie ann. Seo an nuachtán idirlín a tháinig amach in áit ‘Gaelscéal’, an nuachtán clóite. Tá sé réasúnta maith ach tá sé iontach teoranta: iris níos mó ná nuachtán atá ann. Tagann ‘Seachtain’ amach saor in aisce leis an Indo gach Céadaoin. Páipéar beag bídeach atá ann. Tá sé dírithe níos mó ar dhéagóirí ná ar ghrúpa ar bith eile. Níl mé ag gearán faoi sin – tá foilseacháin do dhaoine óga de dhíth. Tá ‘Seachtain’ tarraingteach, ach arís, tá sé teoranta. Teastaíonn nuachtán ceart uainn, nuachtán a chlúdaíonn nuacht thábhachtach náisiúnta agus idirnáisiúnta, páipéar a thugann spás do bharúlacha, páipéar a tharraingíonn na hiriseoirí is fearr sa tir. Caithfidh mé a rá go gcrónaím ‘Foinse’, an forlíonadh a tháinig amach leis an Indo sula raibh ‘Seachtain’ ann. Bhí daoine a raibh samhlaíocht acu ar an fhoireann iontach: chomh maith leis an eagrán seachtainiúil clóite, bhí seirbhís nuachta laethúil ann agus cuireadh a lán ábhar oideachasúil ar fáil ar shuíomh Foinse. Is trua nach bhfuil páipéar clóite neamhspleách againn. Sílim go bhfuil spás sa mhargadh dó. Ba chóir do pháipéar Gaeilge a bheith ábalta fógraíocht a fháil: is tomhaltóirí iad na Gaeilgeoirí i ndeireadh na dála. Ach ag an am seo tá lucht na Gaeilge ag brath ar dhea-thoil nuachtán Béarla, cosúil leis an Journal. Ó thracht mé air seo, tá ceangal fada ag an Journal leis an Ghaeilge: ba cheart do lucht na Gaeilge a bheith buíoch den nuachtán seo as a ról in athbheochan na teanga. Scríobh cuid mhór de na scríbhneoirí móra Conallacha don pháipéar seo san am a chuaigh thart.