Scéal scéil

0
Have your say

Tá ról ar leith ag na meáin chlóite agus chraolta I gcaomhnú agus i bhforbairt na Gaeilge.’ a deir Tadhg Ó Gairbhí in aiste in ‘Scéal scéil’, bailiúchán d’ailt faoi iriseoireacht Ghaeilge.

D’aontódh gach duine leis seo, ach Foras na Gaeilge, is dócha. Níl nuachtán seachtainiúil againn fiú, agus tá an dornán irisí atá againn i mbaol. Léiríonn an leabhar seo cé chomh tábhachtach is atá an iriseoireacht don teanga, agus chomh maith leis sin, taispeánann sé ardchaighdeán scríbhneoireachta na Gaeilge. Tá meascán ann, idir chuimhní cinn, thráchtaireacht ar chúrsaí reatha, léargas ar obair an iriseora, agus chomhairle do scríbhneoirí eile. Mar sin de, tchífidh sibh feabhas suntasach ar chaighdeán an cholúin seo as seo amach toisc go bhfuil an leabhar luachmhar seo léite agam. Ach, i ndáiríre, bhainfeadh léitheoir ar bith leas as an chnuasach seo, ón ghnáthléitheoir go dtí an scríbhneoir proifisiúnta.

Bhí Póilín Ní Chiaráin ag scríobh ar Foinse i rith na Trioblóidí. ‘ Droch-am d’iriseoirí ab ea é an tréimhse sin,’ ar sise.‘Bhí an t-ádh orm nár bhain aon ghortú dom.’ Tugadh veist philéardhíonach di. Bhagair dream uirthi le casúr i bPort an Dúnáin.

Tá an-sásaimh bainteach leis an cheird, áfach. Chuir Déaglán de Bréadún agallamh ar Yasser Arafat, Charlie Haughey, Jimmy Carter, Mo Mowlam agus a lán eile.

Tá sé iontach deacair do chuid a shaothrú ag scríobh sa Ghaeilge. Deir Máirtín Ó Muilleoir: ‘Théip orm leathphingin a dhéanamh ar aon fhoilseachán Gaeilge dá raibh baint agam leis.’

Níl easpa grinn sa leabhar. ‘Tóg sos rialta ó shaol na Gaeilge ar mhaith do shláinte intinne.’(Comhairle ó Sheán Tadhg) Píosa comhairle eile uaidh: ‘Má fhaigheann tú scéal eisiach go bhfuil an bás tugtha ag an Ghaeilge, glan an deoir de do shúil agus bí buíoch de do scúp.’

Tá jab iontach déanta ag an eagarthóir, Breandán Delap. Bíonn alt aige gach mí ar beo.ie, dála an scéil. (‘Scéal scéil’, foilsithe ag Cois Life, + eagrán Kindle)