Bronntar fáinne ar Mhéara Chomhairle Chathair Dhoire agus Cheantar an tSratha Báin

Léiríonn an fáinne go bhfuil an duine a chaitheann é toilteanach Gaeilge a labhairt, agus cé go mbíonn dialann an Mhéara mar chéad saoránach ag cur thar maoil, bhain sí amach cuspóir a bhí aici le tamall fada chun fáinne a ghnóthú in am do Sheachtain na Gaeilge 2024.

Labhair an Méara i ndiaidh di an fáinne bheith bronnta uirthi: “Bhí grá mór agam don Ghaeilge i gcónaí agus nuair a thosaigh mé amach ar mo théarma méarachta, shocraigh mé go n-oibreoinn go crua chun mo chéad fháinne a bhaint amach – gradam Cúpla Focal – agus é bheith déanta agam in am do Sheachtain na Gaeilge 2024 a ritheann ón 1ú go dtí an 17 Márta.

"Tá mé bródúil gur bhain mé an chloch mhíle seo amach, agus tá súil agam go mbeidh sé ar mo chumas leanstan le mo thuras teanga nuair a chríochnaíonn mo théarma.

"Lena chois sin, ba mhaith liom comhghairdeas a dhéanamh le fostaithe ar fad na Comhairle a rinne scrúdú an fháinne i rith Sheachtain na Gaeilge agus ba mhaith liom buíochas ó chroí a dhéanamh lenár nOifigeach Gaeilge– Erin Hamilton – as an tacaíocht a chuireann sí ar fáil do gach duine againn atá ag foghlaim Gaeilge sa Chomhairle.”

Ritheann clár Sheachtain na Gaeilge Chomhairle Chathair Dhoire agus Cheantar an tSratha Báin go dtí an 14ú Márta agus tá clár iomlán na féile ar fáil ag an nasc seo: www.derrystrabane.com/gaeilge